O Equipo de Biblioteca xunto co equipo de Dinamización da Lingua Galega propuxeron a recompilación de Cantigas de Reis propias da zona de Quiroga que, sobre todo, os máis maiores coñecen e que consideramos como unha gran riqueza cultural.
Por isto, os nenos e as nenas fixeron unha magnífica recompilación das cantigas tradicionais de reis, as cales podedes escoitar no vídeo que aquí vos compartimos.
Grazas a todos e a todas pola vosa participación e implicación!!
Premendo no seguinte enlace, podedes acceder ás recomendacións lectoras para o Nadal. Boas festas!!
https://view.genially.com/674de59617dbcd63e062e113/guide-recomendacions-lectoras
O día 4 de decembro todo o centro acudiu ao auditorio municipal para ver a representación da obra "Castelao". Esta actividade foi organizada pola área de Normalización Lingüística do Concello de Quiroga en colaboración coa área de cultura de Vicepresidencia 1º da Deputación Provincial e o CEIP de Quiroga.
Nesta representación divertida á par que reflexiva, falóusenos sobre a última tarde que Castelo pasou en Rianxo antes de coller o barco para ir a Arxentina coa súa nai. O texto da mesma é de Paula Carballeira, a dirección de Fina Calleja e en escea, Mónica Camaño e Cris Collazo, quenes amosan na obra a un Castelao de 8 anos na súa vila natal, divertido, feliz, alegre e aventureiro.
O día 3 de decembro celebramos o Día Internacional da discapacidade. Durante esa semana realizamos con todosos cursos diversas actividades de sensibilización, nas que nos poñiamos no lugar das persoas con algunha discapacidade. Fixemos talleres sensoriais e xogamos aos xogos paralímpicos da Boccia e o voleibol sentado.
O alumnado de 6º de primaria tivo hoxe a última sesión , das catro programadas, do obradoiro de mindfulness, ioga, meditación guiada e psicoloxía positiva. Nelas os rapaces e rapazas tiveron a oportunidade de coñecer e poñer en práctica ferramentas paraxestionar as súas emocións, mellorar a concentración e fomentar unha actitude positiva.
.png)
Mes da Ciencia na biblio!! O alumnado do 1º ciclo anda moi ocupado investigando e aprendendo cousiñas do universo. Os nenos de 2º fixéronse expertos na lúa e quixeron compartir todo o que sabían cos seus compañeiros de 1º. Un obsevatorio luar, unha ruleta das fases da lúa e as placas Maquey programadas, eses foron os recursos. O mellor coma sempre, foi a colaboración entre eles e o compromiso pola actividade. Agora todos sabemos un pouquiño máis do noso satélite.
Actividade inicial ou de motivación para iniciar uo proxecto de ciencias. A luz negra como elemento principal para adentrarnos no universo ; e, como sempre, a nosa biblio como centro de recursos.
Para conmemorar o Día Internacional contra a Violencia Machista, as traballadoras do Centro de Información a Muller do concello de Quiroga estiveron no colexio o xoves e o venres da semana pasada para realizar unha serie de actividades de concienciación sobre esta lacra social. As nenas e nenos de infantil e primaria, axudados por Esther, Marisa e as súas mestras, elaboraron pancartas con distintos debuxos e lemas conmemorativos. Con esas pancartas hoxe desfilamos todos e todas pola Rúa Real ata a casa consistorial, onde tivo lugar unha concentración de repulsa contra a violencia cara as mulleres. A continuación a concelleira de igualdade deu lectura a un manifesto, despois representantes de todas as clases de primaria leron os textos reivindicativos de cada clase.
Podedes ver as fotos da actividade premendo na imaxe:
No Samaín, ademais de encher o colexio de caldeiros de meigas arripiantes, a biblioteca organizou un certame de creación literaria, onde o alumnado de primaria, a partir dun dado con lugares e materiais do Xeoparque, tiña que crear conxuros de bruxas. Aquí tedes o terroríficos que quedaron.
O día 8 de novembro conmemoramos o Magosto comendo riquísimas castañas asadas. Ramón, o noso conserxe, asounos as castañas para que despois puidésemos comelas todos e todas. Tras esta rica merenda, levamos a cabo diferentes xogos populares como por exemplo: a corda, a carreira de sacos, o pañuelo, a bomba... entre outros moitos xogos dos que puidemos desfrutar. A continuación deixamos unhas fotos deste día tan divertido:
.JPG)
O alumnado de infantil está inmerso no proxecto do centro ARTE-SAN , centrándose nestas derradeiras semanas nun produto tan típico da nosa contorna como é a castaña. Contamos coa visita dos artesáns de Caurelor cos que fixemos un obradoiro de colares de zonchos, nome co que se denomina ás castañas cocidas. Ensináronnos esta marabillosa tradición que se está a perder e contáronnos a lenda que as envolve, como amuletos protectores fronte aos espíritos da noite de Samaín.
Esta mañá todo o alumnado do colexio desfrutou na biblioteca da actuación da contacontos Sabela Gago.
Sabela reside en Ourense onde compaxina a súa actividade como actriz e docente teatral na compañía Sarabela Teatro, co traballo de dinamización á lectura en Concellos, Cefores, Bibliotecas e Centros educativos de Galicia.
Foi unha actuación que gustou moito aos nosos nenos e nenas que pasaron unha xornada moi divertida.
Podedes ver as fotos premendo na imaxe:
Na mañá do pasado venres, día 25 de outubro, o alumnado de 5° e 6° de primaria realizou unha visita ao Museo Etnográfico de Quiroga. Esta visita enmárcase dentro das actividades programadas neste curso para afondar no coñecemento da artesanía do noso territorio. O alumnado puido observar utensilios propios desta zona que foron empregados para os labores do campo e para diferentes oficios hai anos polos nosos antegos e que, na actualidade, practicamente quedaron en desuso. Cada unha das seccións (a cultura do viño, a lareira, a aldea, a madeira,...) foi explicada pola guía do museo, Mari Carmen, e o alumnado participou facendo preguntas e escoitando relatos dos quefaceres diarios doutros tempos.
Con esta saída, xunto con outras actividades, pretendemos poñer en valor o noso pasado, o noso territorio, os nosos oficios, as nosas xentes. En definitiva, as nosas raíces.
Podedes ver as fotos da visita premendo na imaxe:
Hoxe conmemórase o Día das Bibliotecas. No colexio foi unha xornada de formación de usuarios na que participou todo o alumnado do centro. Proxectouse un vídeo onde nenos e nenas do colexio explicaban que é unha biblioteca, as normas de uso da mesma, como é o proceso de préstamo e como está distribuida a nosa biblioteca en varias seccións. O alumnado de quinto e sexto que participa no programa de voluntariado terá un importante papel no funcionamento da mesma.
Este ano o Equipo de Dinamización da Lingua Galega e o Equipo de Biblioteca do noso CEIP uníronse para propoñervos pasar un rato en familia descubrindo a historia e a tradición do Samaín a través deste genially onde podedes atopar vídeos, música e xogos. Agardamos que vos guste!
Durante este mes tivemos a visita de Branca de Outonía coa súa “Incubadora de espazos cohabitados”. Mediante esta actividade subvencionada pola ANPA todo o alumnado do centro recibiu obradoiros sobre igualdade e diversidade, afondando no concepto de corpo-territorio como inicio da relación das crianzas consigo mesmas e coa contorna.
.jpg)
Durante todo este curso o alumnado de quinto e sexto de primaria participará no proxecto “Me gusta mi río”. Trátase dun proxecto de educación ambiental impulsado pola Confederación Hidrográfica do Miño-Sil para ensinar aos rapaces e rapazas a valorar e cuidar os ríos. Onte tivo lugar a presentación do Proxecto no colexio por parte dun representante da Confederación hidrográfica e dous biólogos, Manuel e Teresa, que formarán parte do equipo que levará a cabo as actividades. O noso traballo de campo será no río Quiroga.
Na segunda semana de outubro, durante tres días tieveron lugar as actividades destinadas a promoción da igualdade entre homes e mulleres e a prevención e loita contra a violencia cara as mulleres. Estes obradoiros foron conseguidos pola ANPA a través dunha subvención destinada a tal fin. Foron Impartidos pola empresa Outonía.
Comezamos un novo curso impulsando un novo proxecto dende a biblioteca: ARTE-SAN. O centro de interese será a artesanía da Ribeira Sacra.
A artesanía é a capacidade que temos os seres humáns para producir obxectos coas mans ou con máquinas e utensilios moi sinxelos.
Investigaremos, estudaremos e valoraremos o labor dos nosos artesáns e artesás.
