PROXECTO "ME GUSTA MI RÍO"

Durante todo este curso o alumnado de quinto e sexto de primaria participará no proxecto “Me gusta mi río”. Trátase dun proxecto de educación ambiental impulsado pola Confederación Hidrográfica do Miño-Sil para ensinar aos rapaces e rapazas a valorar e cuidar os ríos. Onte tivo lugar a presentación do Proxecto no colexio por parte dun representante da Confederación hidrográfica e dous biólogos, Manuel e Teresa, que formarán parte do equipo que levará a cabo as actividades. O noso traballo de campo será no río Quiroga.

PROMOCIÓN DA IGUALDADE ENTRE HOMES E MULLERES

Na segunda semana de outubro, durante tres días tieveron lugar as actividades destinadas a promoción da igualdade entre homes e mulleres e a prevención e loita contra a violencia cara as mulleres. Estes obradoiros foron conseguidos pola ANPA a través dunha subvención destinada a tal fin. Foron Impartidos pola empresa Outonía.

CURSO 2024-2025. NOVO PDI: ARTE-SAN

 Comezamos un novo curso impulsando un novo proxecto dende a biblioteca: ARTE-SAN. O centro de interese será a artesanía da Ribeira Sacra.

A artesanía é a capacidade que temos os seres humáns para producir obxectos coas mans ou con máquinas e utensilios moi sinxelos.

 Investigaremos, estudaremos e valoraremos o labor dos nosos artesáns e artesás. 

PLAN DIRECTOR: CHARLAS SOBRE IGUALDADE E ACOSO ESCOLAR

Hoxe, día 2 de outubro, pola mañá o alumnado de 5° e 6° de primaria tivo a oportunidade de asistir a dúas charlas: unha sobre acoso escolar e otra sobre igualdade. Ambas as dúas forman parte do Plan Director da Garda Civil para a mellora da convivencia e da seguridades nos centros educativos. Foron impartidas por Héctor Méndez, psicólogo da Garda Civil, que mediante a súa amena intervención, fixo que o alumnado estivese moi atento e participativo nas situacións que plantexaba.

Queremos darlle as grazas por informarnos e formarnos nestes temas de tanta importancia.

OBRADOIRO DE IMPROVISACIÓN ORAL EN VERSO (REGUEIFAS)

Esta mañá os alumnos e alumnas de quinto e sexto dos colexios de Quiroga e San Clodio desplazáronse á Casa da Cultura para participar nun obradoiro de regueifas organizado polo servizo de normalización lingüística do concello. Foi unha interesantísima actividade que espertou a curiosidade e a creatividade dos nenos e nenas, que estiveron moi participativos e motivados na elaboración de regueifas, dirixidos polo regueifeiro Pinto D’ Herbón. Grazas por contar co colexio para esta interesante actividade.

NOVO CURSO... NOVO PDI ...

 3, 2, 1 ... Iniciando novo curso. Cal será o PDI deste ano? ... Moi pronto o saberedes!

BENVIDOS E BENVIDAS AO CURSO 2024 - 2025

FINAL DO PROXECTO: UN TERRITORIO CON MOITA HISTORIA

Chegamos ao fin do noso Proxecto Terra e do noso PDI: Un territorio con moita Historia.

Este curso aprendimos moito da nosa contorna, das edificacións que albergaron a historia da nosa zona, os costumes ou o hábitat a través das épocas…

Todo o que aprendimos decidimos plasmalo nun xogo de mesa ao máis puro estilo do Xogo da Oca e cun protagonista moi especial: o Meco.

Un taboleiro que nos leva polos lugares e protagonistas máis destacados do noso Xeoparque ao longo da Historia.

Aqui tedes o Xogo do Meco en dúas modalidades: unha elaborada polo alumnado de infantil ata terceiro de educación primaria e outra de cuarto a sexto.

Agardamos que vos guste e non esquezades botar unha partida en familia nas versións “en liña”

Taboleiro en liña dos peques

https://view.genially.com/.../interactive-content-o-xogo...

Taboleiro en liña dos maiores

https://view.genially.com/.../interactive-content-o-xogo...

PRESENTACIÓN BOOKTRAILER

 Hoxe foi un gran día na nosa biblio! Tivo lugar a proxección dos booktrailer que fixeron os nenos e nenas de cuarto. A finalidade era presentarlle aos seus compañeiros de terceiro o libro do plan lector que lerán o vindeiro curso, "Vampira de biblioteca". Elaboraron outro sobre o conto "Corre, corre, cabaciña" para o alumnado de infantil. Quedamos abraiados coa creatividade do alumnado na elaboración dos seus booktrailer e tamén co efecto motivador que causou nos seus compañeiros. Ben seguro todos quedaron ansiosos por comezar as súas lecturas.

VISITA A BIBLIOTECA DO CLUB DE LECTURA DO IES DE QUIROGA

Hoxe visitounos o alumnado do Club de Lectura do IES de Quiroga que fixeron de contacontos para os nenos e nenas de Educación Infantil. Acompañaron as súas narracións dunhas preciosas ilustracións no Kamishibai e ata nos agasallaron cun precioso debuxo feito por eles/as!

Aproveitaron que era o Día Mundial do Medioambiente para concienciarnos da importancia do seu coidado a través dos contos “oso caroso”, “a orixe das sereas” “vivan las uñas de colores” e “isto non é unha selva”.

Grazas por facernos bailar e pasar un rato marabilloso!

PRESENTACIÓN DO LIBRO "ANIMAIS FANTÁSTICOS DE ALDEA"

Hoxe visitounos na biblioteca Andrea García Martínez, que nos presentou o seu libro “Animais fantásticos de aldea” cuxa acción transcorre na aldea de Froxán. Este libro foi lido polo alumnado de quinto de primaria no segundo trimestre, xa que forma parte do Proxecto Lector do Centro. Moitas grazas Andrea por facernos pasar un rato tan agradable!!

ELECTRÓNICA E ARTE CREANDO O BORRANCHOBOT

 Día de moita enerxía na nosa biblio! Os alumnos e alumnas de primeiro, segundo e terceiro, desfrutaron dun obradoiro impartido por Almu de Competencia Dixital. Coñeceron o funcionamento dos circuitos eléctricos para crear o seu propio BOT. Decorárono ao seu gusto e puxérono a funcionar para facer un "BORRANCHOBOT" colectivo. Coma sempre a colaboración entre eles e a creatividade foi a tónica desta actividade. Ollade a marabilla de resultados pero sobre todo, a cooperación dos procesos. 

OBRADOIRO DE MOCHILAS CO IMAGOTIPO DO PROXECTO

 Durante o 3º trimestre varios grupos do cole elaboraron mochilas cuxa decoración foi o imagotipo que gañou nas eleccións do 1º trimestre.

OBRADOIRO CREACIÓN BOOKTRAILER

 O alumnado de 4º de primaria, desfrutou dun obradoiro de Booktrailer organizado pola Biblioteca Creativa. Roi, profesional da comunicación audiovisual, foi o encargado de guiarnos ao longo de todo o proceso. Non so puxeron en práctica habilidades de comunicación, resolución de conflictos ou cooperación, senon que tiveron que usar a creatividade para poder levar a cabo a actividade. 

Durante toda a xornada asumiron diferentes roles como a representación, gravación ou edición que lle axudaron a crear o seu booktrailer. 

Foi unha gran experiencia da que seguro que sacaremos proveito!