DIA INTERNACIONAL DO LIBRO

Hoxe, conmemorando o Día Mundial do Libro, que se celebrou onte, desplazámonos todos ata a Casa de Cultura para ver un espectáculo da Maga Sargantana. Os nenos e as nenas pasárono moi ben, especialmente os máis peques. Moi agradecidos ao Concello de Quiroga por programar estas actividades culturais en horario lectivo para que os podan desfrutar todos os nenos e as nenas.

Premer na imaxe para ver as fotos:

OBRADOIRO SOBRE A PREHISTORIA. ED. INFANTIL

O martes, 16, o alumnado de infantil tivo o gran pracer de escoitar a Ramón Vila, quen os transportou á prehistoria contándolles como eran os utensilios que empregaban, como pintaban e como iluminaban as covas. Pasárono moi ben e aprenderon moito!

Premer na imaxe para ver as fotos da actividade:

ROTEIRO LITERARIO. 5ª E 6ª DE EP. DÍA DO LIBRO.

Durante toda a mañá do luns, 15 de abril, o alumnado de 5° e 6° de primaria realizou un Roteiro Literario por diferentes rúas e prazas de Quiroga achegándose ata a igrexa de Hospital. Ao longo do percorrido as rapazas e rapaces foron recitando unha escolma de poemas de diferentes escritoras e escritores quirogueses e doutros que tiveron relación con estas fermosas terras.

Nesta saída contamos, unha vez máis, co acompañamento como guía de Ramón Vila e, ademais, tivemos a gran sorte de contar tamén coa presenza excepcional do historiador Xosé Estévez, que foi amigo personal do escritor Manuel María e de Ernesto Guerra Dacal, así como profundo coñecedor das escritoras e escritores do Roteiro.

Foi un auténtico privilexio contar con estas dúas persoas expertas coas que o alumnado se achegou un pouco máis ao importante patrimonio da nosa contorna.

VISITA A PISCILOR E A MARGARIDE

Coa chegada da primavera e do bo tempo, o alumnado de primeiro e segundo puido facer por fin a excursión prevista para o primeiro trimestre.

Neste caso achegáronse a Piscilor para coñecer máis sobre o ciclo das troitas desde o seu nacemento.

Aproveitaron tamén para entregarlle a Óscar, o encargado, dúas cámaras de fototrampeo para estudar a fauna da nosa contorna.

Despois merendaron en Margaride no campo onde se celebra “A Festa do Ouro” e visitaron As Covas do Medo, algo que lles facía moita ilusión despois de estudar a cultura castrexa e os romanos.

Foi un bo día cheo de historia e xa estamos todos e todas preparados para a seguinte!

Podedes ver as fotos da actividade premendo na imaxe: